مدى خطورة ادوات التجميل مجهولة المصدر على الصحة

موضوع مهم جدا
السلام عليكم يا بنات
بس حبيت احذركم من شراء ادوات تجميل مجهولة المصدر لما تسببه من اضرار بالغة بالصحة ..يعني كل يوم بنسمع او نقرا عن عصابة لتصنيع ادوات التجميل الفاسدة وعرضها باسعار رخيصة ..ارجووووووكم خدوا بالكوا الموضوع خطير يعني الكحل مثلا قد يسبب التهابات بالغة بالعين وانفصال في الشبكية وقد يسبب ايضا العمى لا قدر الله ... كريم الاساس والباودر لو فاسد قد يؤدي الى احتراقات بالجلد او حبوب ملوثة ممكن تتعالج في اشهر وقد تترك اثر في البشرة وكذلك الماسكرا ..اما الروج ده حكاية لان في انواع فيها نسبة رصاص عالية ممكن تسبب تسمم ...ايه الحل ؟؟
اشتري دايما ادوات المكياج من اماكن موثوق فيها من محلات ليها اسم معروف زي ناجي وسمير وليم وفيسيز ولابوتيه ومزايا وغيرهم من المحلات الموثوق فيها ..في ناس هتقول ان المحلات دي بتبيع باسعار غالية ومعندهمش ماركات اسعارها معقولة ..لكن بالعكس في منهم محلات بتبيع ماركات اسعارها معقولة جدا ..ولو لاقيتي حاجة عايزاها بس غالية عليكي شوية .. ممكن تعمليلها ميزانية وتجيبيها بعدين لكن اياكي تجيبي بدالها حاجة مش معروفة المصدر ...
كمان متستعمليش حاجة مكان حد لان استعمال ادوات التجميل من شخص لاخر قد تسبب التهابات ومشاكل بالغة بالبشرة لازم ليها اسلوب تعقيم مخصوص يعني احنا كماكييرات بنهتم جدا بالموضوع ده ولازم الفرش تتغسل بعد كل استعمال بمواد مطهرة وادوات المكياج التانية كمان ..وماعتقدش ان البنات العادية بتعمل كده وبالتالي هيكون استعمال الادوات الخاصة بيكي من قبل بنت تانية بدون تطهير مؤذ جدا...
برده عايزة الفت انتباهكم لحاجة كمان وهي تاريخ نهاية صلاحية العبوة المفروض الماركة الكويسة بيكون مكتوب عليها صلاحيتها قد ايه من بعد فتحها ..
لكن لو ملقيتيش ..فالمتعارف عليه ان الماسكرا بتقعد 6 شهور وكريم الاساس ممكن يقعد لحد سنة
اما الحاجات اللي على شكل باودر زي الايشادو والباودر وكده ممكن تقعد سنتين تلاته بشرط ملاحظة عدم حدوث تغير في الملمس او الرائحة
اما الروج ممكن يقعد سنة بس برده اذا لاحظتي عليه تغير في الرائحة او الملمس
واخيرا عايزة اقول ان الاهتمام بالبشرة وخصوصا واحنا داخلين على الصيف اهم مليون مرة من وضع المكياج خصوصا اذا بتحطيه كل يوم وانتي رايحة الشغل او الكلية يعني اهتمي بشرتك الاول صدقيني مش هتحتاجي ساعتها الا رتوش بسيطة جدا من المكياج لان كثرة المكياج خصوصا في الحر ده مؤذية لابعد حد واياكي تفتكري ان الميك اب هيغطيلك عيوب البشرة لانه بالعكس هيزود المشكلة اكتر مع مرور الوقت ...وخلي المكياج التقيل والفن ده كله وانت رايحة مناسبة صدقيني ساعتها هيكون مناسب اكتر


اتمني اكون افادتكم جميعا وشكرا